راهێنەری بە توانا و لێهاتوو و سەركەوتوو (مۆرینهۆ) وەك راهێنەر لە هەر یانەیەك كاری كردبێت توانیویەتی باڵادەستی و سەركەوتن و ئەنجامی باش و بەرچاو بۆ یانەكەی بە دەست بێنێت و خۆشی بەسەركەوتوویی بینیوە، بەڵام ئەوەی شارەزایان و پسپۆران و شرۆڤەزانانی جیهانی تۆپی پێ و ئێمەمانانیش هەستمان پێی كردبێت. مۆرینهۆ بە ناخێكی توندڕەوانەی گەرم لە نێو كارەكانی راهێنەرایەتی و لە نێو یاریگاشدا دەبیندرێت و هەمیشە خۆی بە لێدوانی ئاگرین و شەڕانگێزی سەرقاڵ دەكاتو بە راگەیاندكارێكی توندڕەو لە بواری میدیا خۆی دێنیتە بەرچاوان. لە هەر یانەیەكیش بووبێ كێشەوگرفت لەگەڵ یانەكانی ركابەری دروست بووەو زۆر جاریش لە گیانی وەرزشی دەرچووە، هەموو ئەوانەی ئاگادارن و شارەزاییان هەیە، دەزانن ئەوكاتەی لە یانەكانی پۆرتۆی پۆرتۆگالی و چێڵسی ئینگڵتڕا و ئەنتەرمیلانی ئیتاڵی بوو، كێشەوگرفتی توندی لەگەڵ یانەكانی ركابەر وەك مەشخەڵی ئۆلۆمپیاد گڕی گرتبوو. وێستگەی ئێستای ئەو راهێنەرە تراژیدیایە، خولی لالیگا و یانەی شاهانەی ئیسپانیایە، ئەگەرچی خولی لالیگا بەو مرۆڤە نامۆ نیەو بەر لەوەی لەو سێ شوێنانەی باسمكردن كاری كردبێت، پێشتر وەك وەرگێڕی زمان لەگەڵ راهێنەر فانگاڵ لە یانەی بەرشلۆنە كاری كردووە.
زیاتر لە (100) ساڵە توندوتیژی لە نێوان یانەی ریاڵ مەدرید و بەرشلۆنە بەردەوامی هەیەو لە داهاتووشدا درێژەی دەبێت. بە هاتنی مۆرینهۆش بۆ یانەی شاهانەو دەستبەكاربوونی، فتیلی ئاگری نێوانایان تا راددەیەك خۆشترو بڵێسەی زیاتری سەند. مۆرینهۆ لە یەكەم كلاسیكۆدا لە بری ئەوەی خۆی بە شێوازو تەكتیك و لایەنی دەروونی یاریزانان بۆ یاری كلاسیكۆ ماندوو بكات، زۆر بەتوندی شەڕی راگەیاندنی وەشاند، خۆی بە لێدوانی توندو ئاگرین سەرقاڵ كردو گوتی ئەو رۆژە رۆیی ریال مەدرید (5) گۆلی لێ بكرێت. لە ئەنجامدا بە (5) گۆلی بێ بەرامبەر دۆڕاو وەڵامی درایەوە. خولی لالیگا لە زۆر لایەنەوە لە خول و پاڵەوانیەتییەكانی ئەو وڵاتانەی مۆرینهۆ كاری لێ كردوون جیاوازترە، یانەو راهێنەری ركابەریشی لەگەڵ یانەو راهێنەرەكانی دیكە زۆر جیاوازە. راستە تیپێكی بەهێزی دروستكردووە، بەڵام چۆنی دروستكردووە؟ بە لێزانی و شارەزایی خۆی یان بە كڕینی یاریزانان؟ مۆرینهۆ نەیتوانیوە قبوڵی ئەو راستییە بكات و دانیش بەوە بنێ، كە گواردیۆلای كەتەلۆنی راهێنەرێكی سەركەتووەو لێزانە و توانیویەتی یانەی بەرشلۆنە بە شێوازێكی تازەو نوێ بە جیهانی تۆپی پێ بناسینێ و ئەو هەموو یاریزانە ئەستێرەیەی بەرشلۆنەش لە نێو یەك جەستەدا كۆیان بكاتەوەو لە رووی دەروونیشەوە ئامادەیان بكات و وەك یەك خێزانی تەبا لە نێو خۆیاندا یەكیان بخات، لە پێگەیاندنی یاریزانانی لاویش دەستێكی باڵاو زیرەكانەی هەیە و شێوازێكی تایبەتی یاری تۆپی پێش بۆ بەرشلۆنەو خۆی داڕشتووەو دەشزانێ چۆن هەڵسوكەوت لەگەڵ سەرجەم یارییەكانی بەرامبەر بكات، بە تایبەت لەگەڵ یارییەكانی كلاسیكۆدا. ئەگەرچی لە دوای یاری كلاسیكۆی (10-12-2011) بەچەند رۆژێك مۆرینهۆ لە لێدوانێكدا دەڵێت بەبێ دوودڵی و هیچ شكی تێدا نیە لە هەر پاڵەوانیەتییەك بین دەتوانین جامەكەی بەرز بكەینەوە، بەمەرجێك یانەی بەرشلۆنە بەشداری ئەو پاڵەوانیەتیە نەبێت.
شەڕی سەركەوتن لە یارییەكانی كلاسیكۆ بە پلە یەك بەر لە یاریزانان بۆ راهێنەران دەگەڕێتەوە، مۆرینهۆ لە رووی دەروونییەوە نەیتوانیوە یاریزانان بە شێوازێكی تەندروست و نەرم و نیان و هێمن و لەسەرخۆ بۆ یاری كلاسیكۆ ئامادە بكات و بیر لە تۆڵە كردنەوە و توندوتیژی نەكەنەوە، بە پێچەوانەوە ئەو یاریزانانەی بەو شێوازە و ئاراستەیە بیر دەكەنەوە لە كلاسیكۆدا یاری ناكەن و لەسەر كورسی یەدەك دەبیندرێن، نموونە زۆرە و هەموومان هەست بەوە دەكەین. لە بەرامبەردا گواردیۆلا لەم بارەیەوە سەركەوتوو بووە و دەتوانێ بە باشترین شێوە لە رووی دەروونییەوە یاریزانان بۆ یارییەكان ئامادە بكات و یارییەكانی كلاسیكۆش نموونەی ئەو راستییەن. گواردیۆلا شارەزایی باشتری لە یارییەكانی كلاسیكۆدا هەیە، چونكە وەك یاریزان و راهێنەر بەشداری لە یارییەكانی كلاسیكۆ كردووە، بۆیەش كلیلی سەركەوتن و بردنەوە لەلای خۆیەتی. زۆرجار گوێبیستی كەسانێك دەبم دەڵێن ئەگەر منیش راهێنەری یانەی بەرشلۆنەبم، سەركەوتن بە دەست دێنم. راهێنەری سەركەوتوو و لێهاتوو و لێزان و شارەزا دەڵێت" یازدە یاریزانی باش و لێهاتوو ئاست بەرزم پێ بدەن، تاكو بتوانم ئەنجامی باشتان پێ بدەم" ئەم وتەیە ئەوە دەگەیەنێ هیچ كاتێك یاریزانانی باش و لێهاتوو و ئاست بەرز ناتوانن بەبێ راهێنەرێكی باش ئەنجامی باش و سەركەوتوو بەدەست بێنن. راهێنەری باش و یاریزانانی ئاست بەرز دوو چەمكی هاوبەشن و دەتوانن پێكەوە سوودو بەرهەم ببەخشن.
جەلال سەعید
بۆنەکان
2012-01-28
بۆ بڵاوکردنهوهی ئهم بابهته :
