هونەرمەندی شانۆكار سەركەوت تارۆ لەدرێژەی كارو چالاكییە بەردەوامەكانی سەرقاڵی كاركردن و نمایشكردنی مۆنۆدرامای ( Glory Nest ) هێلانەی شانازییە كە لە نووسین و دەرهێنانی خۆیەتی.
سەركەوت مەجید تارۆ لە لێدوانێكی تایبەتدا گوتی"مۆنۆدرامای ( Glory Nest ) هێلانەی شانازی سێیەمین بەرهەمی نووسین و دەرهێنانمە بە زمانی ئینگلیزی لێرەوە سوپاسی خاتوو كەی گەردی و بەرێز جەمیل سەمین دەكەم كەلە هەرسێ بەرهەمەكاندا هاوكاری زمانەوانیان كردووم".
تارۆ گوتیشی"پێشتر كە بە نواندن بەشداریم لە بەرهەمی شانۆیی و درامای پەروەردەیی و فلیمی ئەمریكی دەكرد، بابەتەكان جیاواز بوون لەگەڵ ئەو دۆزەی ئێمەی كورد بۆیە پەنام بردە بەر مۆنۆدراما بۆ ئەوەی گوزارشت لە دۆزی میللەتەكەمان بكەم و لە ڕێی هەندێ لە لێكچوونە درامیەكانمان وەكوو شایەر و بەییتخوانەكانی پێش تەكنەلۆجیا و كارەبا كە بە بۆچوونی من تا ڕادەیەك لە مۆنۆدراما دەچوون، بەشێوازێكی مۆدێرن و بە تام و بۆنی ناسنامەی شانۆی كوردیەوە بۆ ئەمریكیەكان بە زمانی ئینگلێزی نمایش بكەم، مۆنۆدرامای (Mom) باسی لە زامەكانی كەركوك وەكوو تاكێكی كورد دەكرد، لێرەدا دەمەوێ باس لەوە بكەم كە سوودم لە مۆنۆدرامای وێرانەی هونەرمەند كامەران ڕەووف و چامە شعریەكانی د. ئاراس عەبدولكەریم وەرگرتبوو. مۆنۆدرامای پاكیزە باسی لە بازرگانی بە مرۆڤ و كۆیلایەتی مۆدێرن دەكرد كە هەوێنی بابەتەكە هەژدە پاكیزەكەی زامە گەورەكەی میللەتەكەمان بوو. لە هێلانەی شانازیدا باس لە حەز و ئارەزووەكانی دایك و خۆحەشاردراوێكی بیست ساڵی جەنگ دەكەم و كوونێك لە ماڵەكەیاندا دەبێت كۆشكی تەواو ئاراستە پێجەوانەكانی جەنگ، دوانزە كاژێر ڕێگا دەبڕم بۆ ئەوەی لە حەوتی ئەم مانگە لە سێیەمین فیستیڤاڵی گەنجانی ئەمریكا لە واشنتۆنی پایتەخت ئەم مۆنۆدرامایەم نمایشی دەكەم، ئەمجارەش هەوڵم داوە كارێكی باش بەرهەم بهێنم، بەو هیوایەی لە دەست لەملانی بینەراندا هەموان شاد و سەركەوتوو بین".
مەسعودی مەلا هەمزە - بۆنەکان - هەولێر
2012-02-09
بۆ بڵاوکردنهوهی ئهم بابهته :
